Bavarian Books

In Bayern, Estareich und Südtirol lem circa 22 Milliona Menschn. De Meahrheid vo de Einwohna legt vui Weat afn Eahoit vo da Kuitua und vo de Traditiona. Zua da Identität vo de Leid zäiht aa da jeweilige Dialekt vo da Region. De regionaln Dialekte hom olle oans gmeinsam: Sprochwissnschoftlich buidns den „bairischn Sprochram“. Und ja, ma schreibt an „bairischn Sprochram“ mid „i“ und ned mid „y“ (wia z.B. bei „bayerische Wörter“), wei da Begriff beziagd si af de Zeid bevoa Bayern und Estareich trennt woan is. In de heidign Grenzn vo Estareich und Oidbayern hod damois da Stamm vo de Baiern bzw. Bajuwarn glebt. (Do kinnans meahra driba eafoahn)

Bairische Biacha fia Estareicha, Bayern, Südtirola und Dialektfreind!

Da Zweck vo da Webseitn is, daas ma a grouße Listn mid Dialektbiacha aus olln Teiln Estareichs, Bayerns und Südtirols zamadrogt. Duach des, daas ma de bairischn Biacha a bissal populära mocht, soi da Dialekt auf Daua eahoitn und gfördat wean. (Do findns a aktuelle Listn mid Dialektbiacha)

Leida gibts schäd weng Dialektbiacha. Wenn Eana no oan oda zwoa Biacha fia de Biachalistn eifoin, daad i mi iba a E-Mail gfrein. Und aa, fois Eana säiba de Lust backt, daas a Biachl ibasetzn, ko i Eana gean weidahäifa.

Noch wäichane Kriterien wean bairische Biacha in de Listn afgnomma?

Des oanzige Kriterium is da bairische Dialekt, wuascht ob Noad-, Süd- oda Mittl- bzw. Donaubairisch. Bei da Ibasetzung vom gloana Prinzn hodma aa no vui Weat draf glegt, daas ma Sprochelemente vo olln Teiln Estareichs, Bayerns und Südtirols gleichamoßn ausgwong eibaut. Drum is de Ibasetzung „Da gloane Prinz“ a Gmoaschaftsprojekt und wead ibaroi sau gean glesn.

Aba wia gsogt, aa Biacha de schäd in Niedaestareichisch, Niedabairisch, Obaestareichisch, Obabairisch, Weanerisch, Kärntnarisch, Tirolarisch usw. (daas ma olle afzäiht is oafach zvui…) gschrim san, wean gean af d’Listn afgnomma. As Ziel is, daas ma de Dialekte und bayerische Wörter im „bairischn Sprochram“ fördat und eahoit.

[Gesamt:6    Durchschnitt: 4.7/5]